ប្រុសឆ្លាតស៊ីធីអិន ដែលសាកសមជាយុវជនគំរូម្នាក់ អតីតកុមារក្រីក្រមួយរូបដែលបានចូលរួមយ៉ាងខ្លាំងក្លាជាមួយការងារ អភិវឌ្ឍន៍សង្គម

ថ្ងៃអង្គារ ទី21ខែកញ្ញាឆ្នាំ2010 |

នៅរៀងរាល់យប់ ក្នុងអំឡុងពេលសម្រាកពិសារអាហារពេលល្ងាច ចន្លោះម៉ោង ៧ ទៅ ម៉ោង ៨យប់ ប្រិយមិត្ដដែល ចូលចិត្ដទស្សនាកម្មវិធីព័ត៌មានរបស់បណ្ដាញទូរទស្សន៍កម្ពុជា ស៊ីធីអិន ប្រាកដជាបានឮការអានព័ត៌មាន របស់ពិធីករ-ពិធីការិនី ជាច្រើនរូបរបស់ស្ថានីយ៍ទូរទស្សន៍នេះ។ យុវជន អោម ចែតច័ន្ទណារ៉ា អាយុ២១ ឆ្នាំដែលជាអតីតជ័យលាភីប្រុសឆ្លាតឆ្នាំ ២០០៩ ជាពិធីករមួយរូប ក្នុងចំណោមពិធីករ-ពិធីការិនីអានព័ត៌មានជាច្រើនរូប របស់ស្ថានីយ៍ទូរទស្សន៍ដ៏មានប្រជាប្រិយភាព នេះ។

ពិធីករវ័យក្មេងរូបនេះ បានទទួលចំណាត់ថ្នាក់លេខ១ ក្នុងកម្មវិធីប្រកួតប្រជែងសមត្ថភាពមួយឈ្មោះថា “កម្មវិធីស្រី ឆ្លាតប្រុសឆ្លាត២០០៩” ដែលរៀបចំឡើងដោយស្ថានីយ៍ទូរទស្សន៍ស៊ីធីអិនជារៀងរាល់ឆ្នាំ ចាប់ពីឆ្នាំ ២០០៥ មក។ អតីតប្រុសឆ្លាត២០០៩ ដែលមានរូបសម្បត្ដិស្រស់សង្ហារអំណោយផលពីធម្មជាតិ ទឹកដមសម្លេងមានភាពទាក់ទាញ និងបទ ពិសោធន៍ការងារសង្គមដ៏ច្រើន រូបនេះ បាន និងកំពុងខិតខំប្រឹងប្រែងកសាងកេរ្ដិ៍ឈ្មោះ និងប្រជាប្រិយភាព ក្នុងវិស័យសិល្បៈ ដែលកំពុងរីកចំរើនយ៉ាងខ្លាំងក្នុងសង្គមកម្ពុជាបច្ចុប្បន្ន។

ជាមួយនឹងទឹកមុខដ៍មានប្រជាប្រិយ រាងខ្ពស់ស្រឡះ មាឌធំ សម្បុរស និងសម្លេងពិរោះគួរឱ្យចង់និយាយលេងជាមួយ ណារ៉ា ជាអ្នកស្រុកខេត្ដព្រះសីហនុ ដែលមានជីវភាពមិនសូវជាសំបូរបែបប៉ុន្មានទេ។ ឪពុកជាមន្ដ្រីនគរបាល ម្ដាយជាមេផ្ទះ និងមានបងប្អូន៤នាក់ ណារ៉ា ជាកូនទី២ នៅក្នុងគ្រួសារ។ បើទោះជាមានជីវភាពមិនសូវធូរធារក៍ដោយ ក៍ណារ៉ាទទួលបាននូវ ភាពកក់ក្ដៅ សុភមង្គល និងការគាំទ្រគ្រប់យ៉ាងពីគ្រួសារ ហើយបងប្អូនទាំងបួននាក់ សុទ្ធតែបានចូលរៀនគ្រប់ៗគ្នា។ “ខ្ញុំអាច ឈានជើងមកដល់ពេលនេះ ព្រោះតែការតាំងចិត្ដ និងការជួយជ្រោមជ្រែងពីគ្រួសាររបស់ខ្ញុំ” ណារ៉ានិយាយ។

ណារ៉ា ដែលធ្លាប់ជាក្មេងដើរលក់កាសែតតាមហាងកាហ្វេ បានប្រលងជាប់សញ្ញាប័ត្រទុតិយភូមិ នៅខេត្ដ ព្រះសីហនុក្នុងឆ្នាំ ២០០៨ ដោយការខិតខំប្រឹងប្រែងរៀនសូត្រ និងមានការជំរុញគាំទ្រ និងលើកទឹកចិត្ដពីឪពុកម្ដាយ។ សព្វថ្ងៃ ណារ៉ា ជានិស្សិតឆ្នាំទី២ នៃសាកលវិទ្យាល័យបៀលប្រាយ ផ្នែកអក្សរសាស្ដ្រអង់គ្លេស នៅរាជធានីភ្នំពេញ និងជាទីប្រឺក្សារបស់ បណ្ដាញកុមារអ្នកតស៊ូមតិ (ប.ក.ត) Child Advocate Network (CAN) នៃគណៈកម្មាធិការអង្គការមិនមែន រដ្ឋាភិបាលដើម្បីសិទ្ធិកុមារ (NGOCRC) ដែលមានការិយាល័យកណ្ដាលនៅភ្នំពេញ និងតំបន់ប្រតិបត្ដិការក្នុង ១១រាជធានី-ខេត្ដ។

ពិធីកររូបសង្ហារម្នាក់នេះបានឱ្យដឹងទៀតថា ជីវិតរបស់លោកបានចាប់ផ្ដើមផ្លាស់ប្ដូរក្នុងឆ្នាំ២០០៥ នៅពេលដែលលោក បានស្ម្រ័គចិត្ដចូលជាសមាជិកក្លឹបក្រុមការពារកុមារ របស់អង្គការលីកាដូខេត្ដព្រះសីហនុ។ សមត្ថភាពត្រឹមកុមារធម្មតាម្នាក់ របស់គាត់ ត្រូវបានពង្រឹង និងអភិវឌ្ឍ តាមរយៈសកម្មភាព និងកម្មវិធីទាំងឡាយរបស់ក្លឹប។ នៅឆ្នាំ២០០៦ លោកក៍បាន ស្ម័គ្រចិត្ដចូលជាសមាជិកបណ្ដាញកុមារអ្នកតស៊ូមតិ (CAN) របស់អង្គការ NGOCRC និងជាសមាជិក នៃក្រុមចលនាកុមារ និងយុវជនដើម្បីសិទ្ធិកុមារ (CCYMCR) របស់អង្គការមូលនិធិសិទ្ធិកុមារ (CRF) បន្ថែមទៀត។ ការចូលរួមជាមួយ ក្លឹបកុមារ និងបណ្ដាញកុមាររបស់អង្គការនានាខាងលើ បានធ្វើឱ្យភាពក្លាហាន សមត្ថភាពក្នុងការគិត ការនិយាយវែកញែក និងចំណេះដឹងសង្គមផ្សេងៗ ជាពិសេសចំណេះដឹងពាក់ព័ន្ធនឹងសិទ្ធិកុមារ របស់ណារ៉ា ត្រូវបានដុសខាត់។ ទីបំផុតចំណេះដឹង និងបទពិសោធន៍ទាំងនេះ គួបផ្សំនឹងការតាំងចិត្ដ និងការខិតខំព្យាយាមរបស់គាត់ ណារ៉ា ត្រូវបានសមាជិកបណ្ដាញកុមារ អ្នកតស៊ូមតិ ចាត់ទុកជាសមាជិកឆ្នើមមួយរូប និងបោះឆ្នោតឱ្យធ្វើជាប្រធានរបស់បណ្ដាញដែលមានសមាជិកក្នុង ១១រាជធានី-ខេត្ដ នេះ ក្នុងឆ្នាំ២០០៧។

យុវជន បៀង រ៉ៃយ៉ា ជាអតីតប្រធាន CAN ជំនាន់ក្រោយណារ៉ា បាននិយាយថា “សមាជិកក្នុងក្រុមទាំងអស់សុទ្ធតែ ចូលចិត្ដបងណារ៉ា ពីព្រោះគាត់តែងតែមានទំនាក់ទំនងល្អ និងជាមនុស្សឆ្លាត និងពូកែបង្កើតគំនិតថ្មីៗសំរាប់ក្រុមបណ្ដាញ កុមារយើង។ រ៉ៃយ៉ា បានបន្ថែមថា ណារ៉ាជាមនុស្សចូលចិត្ដលេងសើចច្រើនដោយមិនប្រកាន់ខ្លួន និងរាប់អានមិត្ដភក្ដិ គ្រប់ប្រភេទទោះបីមុន និងក្រោយពេលគាត់ក្លាយជាតារាក៏ដោយ។ ជាងនេះទៅទៀត គាត់តែងតែចែករំលែកនូវចំណេះដឹង ពីការចូលរួមសកម្មភាពនានា ក៍ដូចជាបទពិសោធន៍ផ្សេងៗដែលគាត់មាន ទៅឱ្យសមាជិកក្រុមទៀតផង។

ក្នុងតួនាទីជាប្រធានបណ្ដាញកុមារអ្នកតស៊ូមតិ និងជាសមាជិកក្លឹបកុមារ ណារ៉ា បានចូលរួមចំណែកក្នុងការងារ អភិវឌ្ឍន៍សង្គមជាច្រើន ដូចជាៈ ចុះផ្សព្វផ្សាយពីបញ្ហាជួញដូរ កេងប្រវ័ញ្ចផ្លូវភេទ ទេសចរណ៍ផ្លូវភេទ និងពលកម្មកុមារ បញ្ហាសុខភាពបន្ដពូជយុវវ័យ គ្រឿងញៀន ជំងឺអេដស៍ ជំងឺកាមរោគ បំនិនជីវិត ការពន្យាកំណើត ដល់ប្រជាពលរដ្ឋ អាណាព្យាបាល លោកគ្រូ អ្នកគ្រូ សិស្ស និស្សិត មន្ដ្រីរាជការ អាជ្ញាធរ ម្ចាស់អាជីវកម្ម ម្ចាស់សិប្បកម្ម ម្ចាស់ផ្ទះសំណាក់ និងសណ្ឋាគារគ្រប់មជ្ឈដ្ឋាន ទាំងក្នុងទីប្រជុំជន ក៏ដូចជានៅតាមតំបន់មូលដ្ឋាននានា ក្នុងខេត្ដព្រះសីហនុ ជាពិសេសដល់កុមារ គ្រប់ប្រភេទ ដើម្បីឱ្យពួកគេយល់ដឹងពីសិទ្ធិរបស់ខ្លួន និងចេះការពារខ្លួនឱ្យចៀសផុតពីការរំលោភបំពានផ្សេងៗ ដូចជា កុមារធ្វើការនៅតាមឡូតិ៍នេសាទ កុមាររើសសំរាម កុមារអនាថា កុមាររស់នៅក្នុងអង្គការ និងកុមារលក់ដូរនៅតាម ឆ្នេរសមុទ្រជាដើម។ ការផ្សព្វផ្សាយនេះធ្វើឡើងជាក្រុម តាមមធ្យោបាយជាច្រើន ដូចជាៈ ដើរដង្ហែរជាក្បួន ការសំដែងរឿងខ្លី និពន្ធជាអត្ថបទរឿងអប់រំ តែងកំណាព្យ ការប្រគុំតន្ដ្រី កម្មវិធីវេទិកាសារធារណៈ ច្រៀងចំរៀងអប់រំ កម្មវិធីសំនួរ-ចំលើយ កម្មវិធីជជែកតាមវិទ្យុ ការបោះជំរុំជួបជុំយុវវ័យ ការប្រជុំរាយការណ៍ប្រចាំខែដល់សមាជិកក្លឹប ។ល។ ណារ៉ាក៏ជាសមាជិកម្នាក់ របស់បណ្ដាញការពារកុមារដែលមានតួនាទីឃ្លាំមើលសកម្មភាពរំលោភបំពានលើកុមារទាំងឡាយ ក្នុងសហគមន៍ផងដែរ។

ក្រៅពីនេះ ណារ៉ា ក៏បានចំណាយពេលទំនេរពីការសិក្សារបស់ខ្លួន ចូលរួមជាតំណាងឱ្យកុមារក្នុងខេត្ដព្រះសីហនុ និងកុមារកម្ពុជា ក្នុងវគ្គសិក្ខាសាលា និងកិច្ចប្រជុំសំខាន់ៗជាច្រើន ដើម្បីជជែកក៏ដូចជាញំនាំបញ្ហាកុមារពីសហគមន៍មូលដ្ឋាន ទៅជំរាបដល់ក្រុមអ្នកធ្វើសេចក្ដីសម្រេចចិត្ដ ទាំងកំរិតជាតិ និងអន្ដរជាតិ។ ឧទាហរណ៍ ក្នុងឆ្នាំ២០០៧ ណារ៉ា បានចូលរួមផ្ដល់ យោបល់លើពង្រាងរបាយការណ៍របស់រដ្ឋាភិបាលស្ដីពីការអនុវត្ដសិទ្ធិកុមារនៅកម្ពុជា និងចូលរួមផ្ដល់យោបល់ និងអនុសាសន៍ លើការរៀបចំច្បាប់ស្ដីពីយុត្ដិធម៌អនីតិជនទំនាស់នឹងច្បាប់។ ក្នុងឆ្នាំដដែលនេះ ណារ៉ា ក៏ត្រូវបានបោះឆ្នោតឱ្យទៅចូលរួមក្នុង សន្និសិទកុមារនៃតំបន់អាស៊ីអាគ្នេយ៍ នៅប្រទេសហ្វីលីពីន ដើម្បីរៀបចំសេចក្ដីថ្លែងការណ៍កុមារអាស៊ានមួយ សម្រាប់ដាក់ជូន ថ្នាក់ដឹកនាំអាស៊ានទាំងអស់។ ជាមួយនឹងឱកាសចូលរួមទាំងនេះ ណារ៉ា ទទួលបានចំណេះដឹង និងបទពិសោធន៍ថ្មីៗជាច្រើន ដែលគាត់តែងយកមកចែករំលែកដល់កុមារកម្ពុជាផ្សេងទៀតដែលពុំបានចូលរួម។

“ចំណេះដឹង បទពិសោធន៍ សមត្ថភាព ដែលខ្ញុំខំសន្សំ បានផ្ដល់ភាពជោគជ័យមកឱ្យខ្ញុំដោយនឹកស្មានមិនដល់ ព្រមទាំងជួយផ្ដល់ជាផ្លូវដើម្បីតំរង់ទិសដៅជីវិតរបស់ខ្ញុំទៀតផង“ ណារ៉ា និយាយដោយក្ដីរំភើប និងមោទនភាព។ លោកបាន បន្ដទៀតថា ការដែលលោកបានប្រលងជាប់ជាប្រុសឆ្លាតនេះ ក៍ដោយសារចំណេះដឹង និងបទពិសោធន៍ ដ៏មានតម្លៃទាំងនោះ គួបផ្សំជាមួយនឹងទេពកោសល្យពីធម្មជាតិ ការខិតខំប្រឹងប្រែងហាត់លត់ដំខ្លួនដោយមិនខ្លាចការនឿយហត់ ការជួយតំរែតំរង់ ពីអ្នកនៅជុំវិញ ជាពិសេសការគាំទ្រពីក្រុមគ្រួសាររបស់លោក។

ណារ៉ាបានបញ្ជាក់ថា នេះគឺជាជោគជ័យថ្មីដ៍ធំបំផុតនៅក្នុងជីវិតរបស់លោក វាមិនត្រឹមតែផ្ដល់កិត្ដិយសដល់រូបលោក តែម្នាក់ប៉ុណ្ណោះទេ ថែមទាំងផ្ដល់នូវកិត្ដិយសដ៏ធំធេងដល់ក្រុមគ្រួសារ មិត្ដភក្ដិ និងអ្នកនៅជុំវិញលោក ដែលធ្វើឱ្យពួកគេមាន មោទនភាពចំពោះរូបលោកជាខ្លាំង។ ជាមួយនឹងជ័យលាភីនេះ ណារ៉ាបានយល់ដឹងច្រើនថែមទៀតពីវិស័យសិល្បៈ និងសង្គម។ “ខ្ញុំបានរៀន និងស្គាល់ច្បាស់អំពីវប្បធម៌ ប្រពៃណីខ្មែរ របាំប្រពៃណី ចំរៀងប្រពៃណី និងសំលៀកបំពាក់ខ្មែរបុរាណ។ ទន្ទឹមនឹងនេះ ណារ៉ាក៏បានរៀនសូត្រពីរសជាតិនៃជីវិតពិត ដោយបានស្គាល់ការលំបាក និងការតស៊ូរស់នៅឆ្ងាយពីផ្ទះ ការរៀននូវសុជីវធម៌រស់នៅប្រចាំថ្ងៃ ការដេក ដើរ ឈរ អង្គុយ ហូបចុក នៅក្នុងសង្គម និងទទួលបាននូវមិត្ដភាព ដ៏ល្អពីសំណាក់មិត្ដភក្ដិរួមក្រុម ដែលជួយឱ្យគាត់ប្រែក្លាយខ្លួនទៅជាមនុស្សថ្មីមួយរូបទៀត។

លោក មាស សំណាង អគ្គលេខាធិការ នៃគណៈកម្មាធិការអង្គការមិនមែនរដ្ឋាភិបាលដើម្បីសិទ្ធិកុមារ (NGOCRC) បានឱ្យដឹងថា “ណារ៉ាជាក្មេងមា្នក់ដែលមានភាពក្លាហាន មានការប្ដេជ្ញាចិត្ដខ្ពស់ និងបានចំណាយពេលវេលាផ្ទាល់ខ្លួន ដើម្បីពង្រឹងនូវសមត្ថភាពឱ្យមានការទទួលស្គាល់ពីសង្គម។ លោកបានបន្ថែមទៀតថា អ្វីដែលធ្វើឱ្យណារ៉ាមានភាពជោគជ័យ ដូចថ្ងៃនេះគឺ ចរិតបែបវិជ្ជមានរបស់គាត់ ដែលជួយឱ្យគាត់មានភាពលេចធ្លោនៅក្នុងចំណោមក្រុមកុមារ និងយុវជន ជាពិសេសគឺអាចឱ្យគាត់ចូលចុះទាំងក្នុងចំណោមកុមារ និងមនុស្សចាស់។ យើងក៏មិនអាចបដិសេធបានដែរ ថាជោគជ័យរបស់ ណារ៉ា គឺបានមួយចំណែកមកពីបទពិសោធន៍ការងារដែលបានផ្ដល់ដោយបណ្ដាញកុមារអ្នកតស៊ូមតិ(CAN) និងស្ថាប័នអង្គការ នានាដែលណារ៉ាបានចូលរួម។

លោកសំណាងបានបញ្ជាក់ទៀតថា ចំពោះរូបលោកផ្ទាល់ក៏ដូចជាក្រុមបណ្ដាញកុមារអ្នកតស៊ូមតិ មានមោទនភាព និងរីករាយយ៉ាងខ្លាំងនូវភ័ព្វសំណាង ព្រមទាំងជោគជ័យថ្មីរបស់ណារ៉ា ដែលបានក្លាយជាតារាមួយដួងក្នុងពិភពសិល្បៈ។ វាបានកែប្រែស្ថានភាពណារ៉ា ពីក្មេងក្រីក្រធម្មតាម្នាក់ឱ្យទៅជាមនុស្សដែលមានគោលដៅជីវិតមួយច្បាស់លាស់ មានទំនួល ខុសត្រូវលើខ្លួនឯង រៀនស្គាល់ពីការលំបាក ការប្រកួតប្រជែង ការរៀបចំអត្ដចរិត ការនិយាយស្ដី និងសុជីវធម៌ក្នុងសង្គម។

បច្ចុប្បន្ននេះ ណារ៉ាជាបុគ្គលិកនៃបណ្ដាញទូរទស្សន៍កម្ពុជា ស៊ីធីអិន មានតួនាទីជាពិធីករអានព័ត៌មាន និងជាអ្នកវាយ អត្ថបទព័ត៌មាន ដែលទទួលបានប្រាក់កំរៃសមរម្យសំរាប់ផ្គត់ផ្គង់ការសិក្សារៀនសូត្រ និងការរស់នៅប្រចាំថ្ងៃ ។ សព្វថ្ងៃ ពេលទំនេរពីការងារ និងការសិក្សា ណារ៉ាក៏បានឆ្លៀតដើរបង្ហាញម៉ូតឱ្យហាងសំលៀកបំពាក់មួយ និងថតសំដែងខ្សែភាពយន្ដ និងចំរៀងកាយវិការ ដែលជាក្ដីប្រាថ្នារបស់លោកតាំងពីនៅតូច។ ទន្ទឹមនឹងនេះ ណារ៉ា ក៏តែងតែចំណាយពេល ចូលរួមជួយ ចែករំលែកចំណេះដឹង បទពិសោធន៍ និងចូលរួមក្នុងសកម្មភាពនានារបស់បណ្ដាញកុមារអ្នកតស៊ូមតិជារឿយៗផងដែរ។

ណារ៉ា បានប្រលងជាប់ចំណាត់ថ្នាក់លេខ១ ក្នុងកម្មវិធីស្រីឆ្លាតប្រុសឆ្លាត ក្នុងឆ្នាំ២០០៩ ដែលមានបេក្ខជនបេក្ខនារី ចំនួនច្រើនជាង ៨០០០នាក់ មកពី ១៥ រាជធានី-ខេត្ដ ចូលរួមប្រកួតប្រជែង។

(ដោយៈ គង់ អង្គារវលក្ខណ៍ និងឡាយ រតនា)

បានបន្ទាន់សម័យចុងក្រោយបំផុត (ថ្ងៃសុក្រ ទី31ខែធ្នូឆ្នាំ2010)

មជ្ឈមណ្ឌលឯកសារ